Vicomtech-ek industriaren eraldaketa iraunkorrerako SMARTEYE proiektuan parte hartzen du

Vicomtech-ek, ikusmen eta adimen artifizialeko teknologia aurreratuen garapenean duen esperientziari esker, SMARTEYE proiektuan parte hartzen du, manufaktura-industrian eraginkortasuna eta jasangarritasuna bultzatzera bideratutako asmo handiko ekimena.

Proiektu hau Europako Batzordearen "European Green Deal Industrial Plan" aren barruan dago, eta Eusko Jaurlaritzak finantzatzen du Elkartek 2023 deialdiaren bidez, industria adimenduna eta jasangarria sustatzeko RIS 3 - ZTBP 2030 lehentasun estrategikoaren ildotik. Proiektuaren helburu nagusia baliabideak eta lehengaiak optimizatzea da, bai eta prozesu industrialak digitalizatzea ere, lehiakortasuna eta neutraltasun klimatikoa bermatzeko.

Vicomtech-ek SMARTEYEn parte hartzen du, fabrikazio-prozesuen online eta denbora errealeko karakterizaziorako teknologia berritzaileen garapenari eta inplementazioari buruzko ezagutza emanez.

Zehazki, lineako detekzio-teknologia berrien esplorazioan, doitasun handiko karakterizazioan, sistema fotoniko trinkoetan berrikuntzan eta baldintza dinamikoetarako moldagarriak diren sentsore fotonikoen integrazioan zentratzen da Vicomtech. Teknologia horiek funtsezko sektoreetan aplikatzen dira, hala nola manufakturan, elikaduran eta beiraren industrian, eta industria-prozesuak gauzatzeko modua iraultzea agintzen dute, kalitate eta eraginkortasun handiagoa bermatuz.

Gainera, Vicomtech funtsezko pieza da teknologia disruptibo horiek integratzeko eta baliozkotzeko, ingurune errealetako kontzeptu-proben bidez haien eraginkortasuna eta bideragarritasuna ziurtatuz. Ikuspegi zorrotz eta emaitzetara bideratutako horrek bermatzen du garatutako konponbideak gai izango direla hainbat industria-sektoreren behar espezifikoak asetzeko, eta, horrela, aurrerapen teknologikoa eta garapen jasangarria lortzen lagunduko da.

Bestalde, Deep Learning, irudi sintetikoen sorkuntza, denbora errealean egokitzeko eta zuzentzeko teknologiak eta sentsore fotoniko trinkoak proiektu honetan ikertzen eta garatzen diren beste teknologia batzuk dira.

Proiektuaren partzuergoa honako hauek osatzen dute: Tecnalia Research & Innovation Fundazioak (proiektuaren liderra), Vicomtech Ikusizko Elkarrekintza eta Komunikazio Teknologien Zentro Fundazioak, Tekniker Fundazioak, BC Materials – Basque Center for Materials, Applications and Nanostructures, Mondragon Goi Eskola Politeknikoa S.Coop eta UPV/EHUk (Kimika Analitikoaren Saila). Lurraldeko eragileen arteko lankidetza funtsezkoa da enpresei transferitu ahal zaizkien abangoardiako teknologiak garatzen jarraitzeko, lehiakortasuna hobetzeko.