Machine Learning & Generative AI
Adimen Artifizialean, Machine Learning teknologiak (ikasketa automatikoa) esperientziatik abiatuta beren errendimendua hobetzeko gai diren algoritmoak eta sistemak diseinatzeko aukera ematen digute. Datu etiketatuekin egindako ikasketa gainbegiratuaren bidez, ikuspegi erdi-gainbegiratuen bidez edo, are gehiago, aurretiazko etiketarik gabeko metodo ez-gainbegiratuen bidez, teknika hauek ereduak ateratzeko eta balio handiko modeloak sortzeko aukera ematen dute. Horri gehitu behar zaizkio Reinforcement Learning edo sare neuronal sakonetan oinarritutako Deep Learning estrategiak, arazo konplexuei aurre egiteko dugun gaitasuna nabarmen handitu baitute. Gaur egun, ordea, AA sortzailearen agerpenak paradigma tradizionalak errotik eraldatzen ari da. Testua, irudiak, bideoak, kodea edo simulazioak sortzeko gai diren ereduek bide berriak irekitzen dituzte prozesuak automatizatzeko, sormena indartzeko eta berrikuntza bizkortzeko. Ikasketa automatiko klasikoa eta eredu sortzaileak uztartzeak irtenbide malguagoak, moldagarriagoak eta giza arrazoibidera hurbilago daudenak garatzeko aukera ematen du. Vicomtech-en, hain zuzen ere, gaitasun horiek ikertu eta integratzen ditugu enpresen benetako arazoei erantzuteko, beharrak aurreikusteko eta duela urte gutxi arte posible ez zen hori zabaltzen duten tresna adimendunak eskaintzeko.
AA Sortzailea
AA sortzailea hizkuntza-eredu handietatik harago eboluzionatzen ari da, eta Vicomtech-en trantsizio hori benetako soluzio multimodaletara bultzatzen dugu. Gure ikuspegiak testua, irudia, bideoa, ahotsa, seinale industrialak eta datu sentsorialak uztartzen ditu, mundua ulertzeaz gain, haren gainean jarduteko gai diren sistemak sortzeko. Visual Language Action Models bezalako paradigma aurreratuen bidez, ingurune konplexuak interpretatzeko, erabakiak hartzeko eta ekintzak gauzatzeko gai diren teknologiak garatzen ditugu, ezagutza aditua eta gaitasun sortzaileak integratuz.
Horri esker, Industria, Oil & Gas, osasuna, garraioa, zibersegurtasuna, energia, azpiegitura kritikoen zaintza, zerbitzuak, komunikazioa eta hizkuntza, eta Internet & Media bezalako arloetan aplikatutako soluzioak eskaintzen ditugu, non funtsezkoa den hainbat modalitateren ulermen bateratua. Horrela, LLM tradizionalen mugak gainditzen ditugu, eta testuinguru-adimena, gaitasun operatiboa eta gure bezeroen benetako prozesuetan eragin zuzena duten ereduak eraikitzen ditugu.
Machine Learning teknologiek oinarrizko beste batzuk aberasten dituzte
Machine Learning teknologiek lotura zuzena dute Vicomtech-eko funtsezko beste teknologia batzuekin, eta sustatu egiten dituzte. Computer Vision teknologian aplikatzen dira, adibidez, akats industrialak sailkatzeko, gidatze autonomoko arrisku-egoerak iragartzeko edo minbiziaren irudiak aztertzeko. Data Intelligence teknologian ere aplikatzen dira, baliozko informazioa eta ondorioak ateratzeko, hala nola makinen sentsoreetako eta industria ekoizpeneko datuetan oinarritutako iragarpenak. Speech, Dialogue & Natural Language Processing teknologian, adibidez, orain arte lortu gabeko mailetara hobetzen dituzte transkripzio- eta itzulpen-sistemak. Machine Learning hainbat teknologia eta sektoretako gaitzaile bat da.
Pare bat adibiderekin hobeto uler daiteke Machine Learning-en aplikagarritasuna. Errealitate Areagotuko estazioak sortzen lagundu diogu enpresa elektroniko garrantzitsu bati, langileek dozenaka mila osagai elektroniko munta ditzaten, adibide gutxi batzuetatik abiatuta automatikoki ikasten duen sistema batekin. Machine Learning-en oinarritutako sistema bat eskaini diogu nazioartean aitzindari den automobilgintza-enpresa bati, bideo kantitate handietan oharpenak erdi-automatikoki egin ahal izan ditzan gidatze autonomoko sistemak prestatzean. Prozesu jarraituko industria bati ekoizpeneko akatsak aurreikusten eta horiei aurre hartzen lagundu diogu, oinarritzat hartuta bere sentsore eta kontrol sistemen datuak, eta aurrezpena nabarmena izan da. Adibide horiek eta beste askok Machine Learning-en garrantzia eta aplikagarritasuna erakusten dute.
Arrakasta-kasua
- Argitalpenak
- Proiektu nagusiak
Zure hurrengo proiekturako kide bila zabiltza? Idatz iezaguzu, laguntzeko irrikan gaude.
