Kompaï robotaren ikusizko pertzepzio-gaitasunak areagotzea, prozesatze paraleloa erabilita

Robotak etxeko langile perfektua izan litezke, atsedenik eta kexarik gabe lan egin dezaketelako. Zoritxarrez, robotika autonomoaren gaur egungo teknologia amets horretatik urrun dago. Hala ere, roboten pertzeptzio-maila hobetzea adimen handiagoa izatea ahalbidetuko du. Ildo horretatik, azken urteotan ikerketa akademikoak aurrerapen garrantzitsuak lortu ditu ordenagailu-ikusmenean, eta gizakiek eta makinek modu naturalago batean elkarreragin dezakete. Aurrerapen horien artean daude giza figuraren, buruaren, aurpegiaren eta aurpegi-adierazpenen detekzioa kamera mugimenduan dagoenean ere, eta keinuen detekzioa eta ezagutzea. KOMPEYE esperimentuak xede du pertzepzio-teknologien eta pertsonak artatzeko zerbitzu-robot autonomoetan teknologia horiek eraginkortasunez inplementatzearen arteko langa gainditzea.

Helburu orokorra da ordenagailu-ikusmenaren teknologiak modu konbinatuan eta osagarrian aplikatzea, markatzailerik gabe eta ikuspegi independente batez giza figura, burua eta aurpegia detektatzeko, aurpegi-emozioak ezagutzeko, keinuak antzemateko eta ezagutze-hurbilketak baliatzeko, robotek ikusizko pertzepzio kognitibo autonomo aurreratua izan dezaten. Esperimentu honen emaitzei esker, zerbitzu-robotak gai izango dira gizakiak artatzeko,  arazorik duten antzemateko eta horren arabera jarduteko. 4 erakuslek gidatu eta ebaluatuko dute esperimentua, benetako barne-inguru batean eta kontrolatu gabeko barne-inguru batean, Robosoft enpresaren Kompaï laguntza-robotaren bertsio eraldatuarekin.

Esperimentuaren garapen nagusiek helburu izango dute ordenagailu-ikusmeneko algoritmo aurreratuak modu optimoan integratzea, robota gai izan dadin arazoak dituen jendea detektatzeko, kamerak soilik erabilita. Esperimentuak 4 ataza tekniko desberdin barne hartuko ditu. Proiektuaren aurrerapausorik garrantzitsuena da teknika horiek guztiak roboten ikusizko pertzepzioan sinergikoki aplikatzea, GPU bidezko prozesatze paraleloa aprobetxatuta eta gizaki-robot komunikazioaren gabeziak konponduta.

http://www.echord.info/wikis/website/kompeye