Aurrerapen teknologikoak ziberkrimenaren bidezko diru zuritzearen aurkako borrokan

Vicomtechek modu aktiboan parte hartzen du jarduera kriminal digitalen bidez sortutako diru zikinaren ibilbidea identifikatzeko tresna berritzaileak garatzen. SafeHorizon proiektu europarraren baitan, helburua da erakunde kriminalen irabaziak zailtzea, haien finantziazio-iturriak mugatzea eta ziberkrimenaren aurkako jarduerak babestea.

Ransomware bidezko erasoek edo online iruzurrek ez dute amaiera izaten datuen edo diruaren lapurretarekin; azken fasean, delituaren bidez eskuratutako irabaziak legezko itxura duten fondo bihurtzen saiatzen dira, kapitalak zuritzeko operazioen bidez. Prozesu horretan, kriptotxanponen erabilerak paper garrantzitsua du, eta ohikoa da transakzio digital konplexuen sarea erabiltzea finantza-fluxuak ezkutatzeko. El País egunkariko erreportaje batean, Raúl Orduna Vicomtech-eko Segurtasun Digitaleko arduradunak adierazi duenez: “Itzalean dagoen ekonomia global erraldoi eta konplexu bat sortu da.”

Testuinguru honetan, Vicomtech hainbat ekimenetan ari da parte hartzen, horien artean SafeHorizon proiektuan, enpresekin, ikerketa-zentroekin eta segurtasun indarrekin elkarlanean, Europar Batasunaren gaitasuna indartzeko xedez, zibermehatxu berriei eta antolatutako kriminalitateari aurre egiteko. Besteak beste, blockchain sareetan portaera susmagarriak adieraz ditzaketen ereduak detektatzea dugu helburu, hala nola mixer edo legezko kanaletatik kanpo dabiltzan plataformen erabilera.

“Segurtasun indarrek behar duten informazio mota eta haien ustez erabilgarriak diren erlazioak identifikatzen saiatzen gara. Jarduera hori antzeman daitekeen adibideren bat bilatzen dugu edo datu sintetikoak sortzen ditugu egitura horrekin, ereduen garapena eta proba egiteko” azaldu du Raúlek.

Gaur egun ziberkrimenaren aurkako ikerketaren zati handi bat erasoak nola egiten diren ulertzera, defentsak hobetzeko, segurtasun-arrakalak aurreikusteko eta sarreren kalteak arintzeko bideratzen da. Baina ikertzaileek beste zeregin garrantzitsu bat dute: erakunde kriminalek sortutako diruaren arrastoa jarraitzea. Eta haien lana funtsezkoa da erasotzaileen irabaziak zailtzeko eta pizgarri ekonomikoa ahultzeko.

Lan horren bidez, Vicomtech aliatu estrategiko gisa kokatzen da finantza-erakunde eta segurtasun indarren ondoan, kapital zikin digitalaren aurkako borrokan. Ezagutza espezializatua eta teknologia aurreratuak eskaintzen ditu diru ilegala identifikatzeko eta ziberkriminalen negozio-eredua ahultzeko.