Vicomtech, AI-BOOSTen Europako AI Challenge Competition lehiaketako lehen faseko irabazleetako bat, LUSYN proposamenarekin
Zentro teknologikoa adimen artifiziala erabiltzen duen soluzio bat garatzen ari da, biriketako minbizia duten pazienteen datu sintetikoak sortzeko eta ikerketa medikoa bultzatzeko.
03.11.2026
Vicomtech AI-BOOST ekimenak bultzatutako Europako AI Challenge Competition lehiaketako 3. erronkako bost irabazleetako bat izan da.
Zentroaren LUSYN (Lung Cancer Synthetic Data Generation) proposamenak lehiaketaren lehen fasea (Spark Phase) gainditu du, eta hurrengo fasera igaroko da. Fase berri horretan, soluzioa garatu eta baliozkotuko da. Urriaren 15ean, Vicomtech-ek Advance Phase fasearen hasiera-ekitaldi ofizialean parte hartu zuen.
LUSYNek osasun-arloan adimen artifiziala erabiltzeko erronka nagusietako bati heltzen dio: eredu fidagarriak garatzeko behar diren datu klinikoen eskasia. Minbiziaren ikerketan, datu falta horrek zaildu egin dezake adimen artifizialeko sistemak entrenatzea eta pazienteen aniztasuna behar bezala islatzea.
Erronka horri aurre egiteko, Vicomtech-ek EUCAIMekin (European Federation for Cancer Images) lan egingo du, biriketako minbizia duten pazienteen datu sintetiko errealistak sortzeko soluzio bat garatzeko. Datu horiek lehendik dagoen informazioa osatzeko eta datu-multzoetako hutsuneak betetzeko balioko dute. Horrela, adimen artifizialeko eredu fidagarriagoak garatzen eta minbiziaren ikerketan aurrera egiten lagunduko dute.
Datozen bost hilabeteetan, Vicomtech-eko taldeak soluzioa garatu eta baliozkotuko du. Prozesua 2027ko otsailean Bruselan egingo den zuzeneko erakustaldi batekin amaituko da. Bertan, garatutako azken prototipoak ebaluatuko dira.
Hautaketa horrek Vicomtech-ek berrikuntzarekin eta osasun-arloan aplikatzeko adimen artifizialeko soluzioak garatzearekin duen konpromisoa indartzen du. Helburua oztopo teknologikoak gainditzea eta ikerketa mediko hobea egiten laguntzea da.
