Vicomtech eta Tekneik aliantza estrategikoa sinatu dute Adimen Artifizialeko teknologien transferentzia bizkortzeko

Vicomtechek eta Tekneik lankidetzarako esparru-hitzarmen bat sinatu dute ikerketa aplikatuko proiektuen garapena sustatzeko eta teknologia aurreratuen transferentzia merkatura bizkortzeko. Aliantzak lankidetza zientifiko eta teknologikorako esparru egonkor bat ezartzen du, bi erakundeen gaitasunak uztartu, irtenbide berritzaileak garatu eta egungo erronka teknologikoei elkarrekin erantzuteko.

Hitzarmen honen bidez, Vicomtechek Adimen Artifizialean eta teknologia digitaletan erreferentziazko zentro teknologiko gisa duen posizioa indartzen du, eta enpresa-sarearekin duen lankidetza sendotzen du, ezagutzaren transferentzia errazteko eta sektore estrategikoetan sortzen ari diren teknologien erabilera bizkortzeko.

Ikerketa aplikatua Adimen Artifizialean

Lankidetza I+Gko proiektuak garatzera bideratuko da, besteak beste, Adimen Artifiziala, datu-espazioak, ordenagailu bidezko ikusmena, lengoaia naturalaren prozesamendua (NLP), Machine Learning, Data Intelligence eta Quantum Machine Learning arloetan.

Garatuko diren soluzioak industriaren, mugikortasunaren, energiaren, osasunaren, administrazio publikoaren, segurtasunaren eta zibersegurtasunaren arloetako erronkei erantzutera bideratuko dira.

Berrikuntza eta transferentzia teknologikoa sustatzeko lankidetza-esparrua

Hitzarmenak ikerketa eta berrikuntzako proiektu bateratuak garatzea, lankidetza-aukera berriak identifikatzea, ezagutza zientifiko eta teknologikoa sortzea eta nazioko zein nazioarteko ekimenetan parte hartzea aurreikusten du. Gainera, bi erakundeek prestakuntza-ekintzak, talentuaren garapena eta dibulgazio-jarduerak sustatuko dituzte, ezagutza euskal enpresa-sarera nahiz nazioarteko enpresa-ekosistemara modu eraginkorrean transferitzeko.

Gorka Varela Vicomtecheko Business Development Manager for Language Technologies arduradunaren hitzetan, “Tekneirekin dugun lankidetzak Vicomtechek berrikuntzaren eta transferentzia teknologikoaren eragile gisa betetzen duen zeregina irudikatzen du. Adimen Artifizialak erakundeak eraldatzeko eta eragin ekonomiko zein soziala sortzeko duen ahalmenaren inguruko ikuspegi partekatua dugu. Hitzarmen honi esker, gaitasun teknologiko berriak elkarrekin garatu eta ikerketaren emaitzak industriaren eta administrazio publikoen erronka nagusietara hurbiltzeko aukera izango dugu”.

Aliantza honek, oraingoz, lau urteko iraupena du, eta Vicomtechek ikerketa aplikatuarekin eta enpresekin duen lankidetzarekin duen konpromisoa sendotzen du, Adimen Artifizialean oinarritutako irtenbideen garapena bizkortzeko, lehiakortasuna eta eraldaketa digitala sustatzen laguntzeko.